ဒုတိယဝန်ကြီး ဦးနေမျိုးလှိုင် Smart School နှင့် Football for School Program အကောင်အထည်ဖော်ဆောင်ရွက်မည့် ကျောင်းနှစ်ကျောင်း ကြည့်ရှုစစ်ဆေး

မန္တလေး မေ ၆

ပညာရေးဝန်ကြီးဌာန ဒုတိယဝန်ကြီး ဦးနေမျိုးလှိုင်သည် ညွှန်ကြားရေးမှူးချုပ်များ၊ တာဝန်ရှိသူများနှင့်အတူ ယနေ့နံနက်ပိုင်းက Smart School နှင့် Football for School Program အကောင်အထည်ဖော်ဆောင်ရွက်နိုင်ရန် မန္တလေးတိုင်းဒေသကြီးအတွင်းရှိ လျာထားအခြေခံပညာကျောင်း နှစ်ကျောင်းကို ကြည့်ရှုစစ်ဆေးသည်။

ပြောကြား

ဦးစွာ ပြည်ကြီးတံခွန်မြို့နယ် အမှတ် (၂၇) အခြေခံပညာနှင့် စက်မှု၊ စိုက်ပျိုး၊ မွေးမြူရေးအထက်တန်းကျောင်းကို ကြည့်ရှု စစ်ဆေးပြီး နိုင်ငံတော်၏ ရက် (၁၀၀) စီမံချက်တွင် ပါဝင်သည့် Smart School နှင့် Football for School Program အကောင်အထည်ဖော်ဆောင်ရွက်နိုင်ရန် ကမ္ဘာ့ဘောလုံးအဖွဲ့ချုပ် (FIFA) ၏ သတ်မှတ်စံနှုန်းနှင့် ကိုက်ညီသော ဘောလုံးကွင်း  တည်ဆောက်ပေးမည်ဖြစ်ကြောင်း၊ Smart School များမှတစ်ဆင့် အားကစားသမားများ စနစ်တကျပေါ်ထွက်လာပြီး အားကစားကဏ္ဍကို ပညာရေးစနစ်နှင့် ဟန်ချက်ညီညီ ပေါင်းစပ် လုပ်ဆောင်သွားမည်ဖြစ်ကြောင်း၊ စံပြကျောင်းဖြစ်စေရေး ဆရာ ဆရာမများ၊ မြို့နယ်၊ ခရိုင်၊ တိုင်း ဒေသကြီး ပညာရေးမှူးများ၊ ကျောင်းအကျိုးတော်ဆောင်များနှင့် ရပ်မိရပ်ဖများ ပူးပေါင်းဆောင် ရွက်ကြစေလိုကြောင်း ပြောကြားသည်။

ထို့နောက် ဒုတိယဝန်ကြီးသည် အမရပူရမြို့နယ် အခြေခံပညာအထက်တန်းကျောင်း (ယန္တရား) သို့သွားရောက်၍ ကျောင်းဆောင်များတွင် ပြင်ဆင်ထိန်းသိမ်းရေးလုပ်ငန်း ဆောင်ရွက်နေမှုကို ကြည့်ရှုစစ်ဆေးပြီး လိုအပ်သည်များ ပေါင်းစပ်ညှိနှိုင်းဆောင်ရွက်ပေးခဲ့ကြောင်း သိရသည်။

သတင်းစဉ်