អ.ស.ប ៖ អង្គការសហប្រជាជាតិ បានព្រមានធ្ងន់ៗថា សង្គ្រាមនៅអ៊ីរ៉ង់ កំពុងបិទខ្ទប់ជំនួយស្បៀងអាហាររាប់ពាន់តោនហូរចូលស៊ូដង់ ដែលជាប្រទេសរងគ្រោះធ្ងន់ធ្ងរបំផុតពីគ្រោះទុរ្ភិក្ស និងបណ្តាប្រទេសដទៃទៀតនៅទ្វីបអាហ្វ្រិក ខណៈការបិទច្រកសមុទ្រ Hormuz ក៏បានរំខានដល់ការដឹកជញ្ជូនតាមផ្លូវទឹកទូទាំងពិភពលោកផងដែរ ។
សង្គ្រាមស៊ីវិលនៅប្រទេសស៊ូដង់ ដែលឥឡូវនេះឈានចូលដល់ឆ្នាំទី ៤ ហើយនោះ បានបង្កឲ្យមានគ្រោះមហន្តរាយមនុស្សធម៌ដ៏អាក្រក់បំផុតមួយរបស់ពិភពលោក ខណៈអង្គការសហប្រជាជាតិបានធ្វើការប៉ាន់ប្រមាណថា មនុស្សជិត ៣៤ លាននាក់នឹងត្រូវការជំនួយជាបន្ទាន់ ។
យោងតាមកម្មវិធីស្បៀងអាហារពិភពលោក (WFP) របស់អង្គការសហប្រជាជាតិ បានឱ្យដឹងថា ការដឹកជញ្ជូនស្បៀងអាហារបន្ទាន់ បានជាប់គាំងនៅកំពង់ផែនានាក្នុងប្រទេសអូម៉ង់ និងកេនយ៉ា ជាកន្លែងដែលក្រុមហ៊ុនដឹកជញ្ជូន កំពុងតស៊ូជំនះការងារកកស្ទះដ៏ច្រើន ដែលបណ្តាលមកពីការបិទច្រកសមុទ្រ Hormuz ។
ទន្ទឹមនេះ ស្បៀងអាហាររាប់ពាន់តោនដែលមានគោលដៅដឹកជញ្ជូនឆ្ពោះទៅកាន់ប្រទេសស៊ូដង់ ត្រូវបានពន្យារពេលរហូតដល់ទៅ ៥០ ថ្ងៃ ។
ឆ្លើយតបបញ្ហានេះ នាយិកាផ្នែកផ្គត់ផ្គង់របស់ WFP លោកស្រី Corinne Fleischer បាននិយាយថា សម្រាប់ប្រទេសស៊ូដង់ យើងត្រូវតែស្វែងរកមធ្យោបាយបញ្ជូនជំនួយបន្ទាន់ទៅដល់ទីនោះឱ្យបានលឿនជាងមុន ។ លោកស្រីថា ប្រជាជននៅទីនោះ កំពុងរស់នៅយ៉ាងលំបាកវេទនារួចទៅហើយ ដោយសារតែការថយចុះហិរញ្ញប្បទានផ្នែកមនុស្សធម៌ ។
បើតាម Straits Times,ការបិទផ្លូវទឹកស្ទើរតែទាំងស្រុងនៅច្រកសមុទ្រ Hormuz បានធ្វើឲ្យទីផ្សារទំនិញគ្រប់ប្រភេទប្រែប្រួល ចាប់ពីប្រេង និងឧស្ម័ន រហូតដល់ផលិតផលឧស្សាហកម្ម និងកសិកម្ម ។
ការរំខាននេះ ក៏បានប៉ះពាល់យ៉ាងខ្លាំងដល់ប្រតិបត្តិការរបស់អង្គការនានា ដូចជា WFP ដោយសារការផ្គត់ផ្គង់សំខាន់ៗកំពុងស្ទះកកកុញនៅតាមកំពង់ផែ ហើយស្ថានភាពនេះកាន់តែអាក្រក់ទៅៗ ដោយសារការកាត់បន្ថយជំនួយមនុស្សធម៌ពីប្រទេសផ្តល់ជំនួយធំៗមួយចំនួន ៕
ប្រភព ៖ The Straits Times ប្រែសម្រួល ៖ ឈឹម ទីណា
微信扫一扫 立即联系我们
简体中文
