Britaniya parlamenti tamaki sotishni taqiqlovchi qat'iy qonunni ma'qulladi

Buyuk Britaniya parlamenti mamlakat tarixidagi eng qatʼiy qonun loyihalaridan birini maʼqulladi. Bu haqda Zamin.uz xabar berdi.

Jamoalar palatasi va Lordlar palatasi tamaki hamda veyp mahsulotlarini tartibga solishga qaratilgan yangi hujjat yuzasidan yakuniy toʻxtamga keldi. Mazkur qonun loyihasi endilikda qirol Charlz III tomonidan imzolanishi kutilmoqda.

Qirolning tasdigʻidan soʻng yangi tartib-qoidalar rasman kuchga kiradi va mamlakatda tamaki isteʼmolini bosqichma-bosqich yoʻqotishga xizmat qiladi. Yangi qonunning asosiy maqsadi kelajak avlodni tamaki qaramligidan butunlay xalos qilishdir.

Belgilangan qoidalarga koʻra,2027-yil 1-yanvardan boshlab,2009-yilning birinchi yanvaridan keyin tugʻilgan barcha fuqarolarga tamaki mahsulotlarini sotish butun umrga taqiqlanadi. Bu shuni anglatadiki,qonun kuchga kirgan vaqtda 17 yosh va undan kichik boʻlgan shaxslar umrining oxirigacha sigareta,sigara yoki har qanday turdagi tamaki mahsulotlarini rasmiy doʻkonlardan sotib olish huquqiga ega boʻlmaydi.

Yosh chegarasi har yili bir yoshga oshirib boriladi,bu esa vaqt oʻtishi bilan jamiyatning katta qismini qamrab oluvchi tamakisiz muhitni yuzaga keltiradi. Shu bilan birga,zamonaviy elektron sigaretalar va veyplar ustidan nazorat ham sezilarli darajada kuchaytiriladi.

Hukumat nikotin saqlovchi mahsulotlarning turli xil yoqimli taʼmlari,ularning jozibador koʻrinishi hamda reklama qilinishini cheklash boʻyicha keng huquqlarga ega boʻldi. Ayniqsa,yoshlar orasida ommalashgan va sogʻliqqa jiddiy zarar yetkazadigan vositalarning targʻibotiga chek qoʻyiladi.

Qonun doirasida maktablar,bolalar maydonchalari va boshqa jamoat joylari atrofida veyp chekish qatʼiyan man etiladi. Buyuk Britaniya sogʻliqni saqlash vaziri Ues Striting ushbu tashabbusni millat salomatligini asrash yoʻlidagi ulkan qadam deb atadi.

Uning soʻzlariga koʻra,chekish mamlakatda oldini olish mumkin boʻlgan oʻlim holatlarining asosiy sababchisi boʻlib qolmoqda. Maʼlumotlarga koʻra,har yili 80 mingga yaqin britaniyalik aynan tamaki keltirib chiqargan kasalliklar oqibatida vafot etadi.

Bu esa davlat byudjeti va sogʻliqni saqlash tizimiga juda katta iqtisodiy zarar yetkazmoqda. Britaniya hukumati ushbu qatʼiy choralar orqali yoshlar oʻrtasida chekish darajasini minimal darajaga tushirishni va uzoq muddatli istiqbolda butunlay tutunsiz jamiyat barpo etishni rejalashtirgan.

Qirol roziligi olingach,qonunni hayotga tatbiq etish bosqichma-bosqich amalga oshiriladi va u dunyodagi eng samarali sogʻliqni saqlash tajribalaridan biri boʻlishi kutilmoqda.