ایران کے خلاف جارحیت کی صورت میں ہم پہلے سے طے شدہ اہداف پر حملہ کریں گے: خاتم الانبیا مرکزی ہیڈکوارٹر

تہران(ڈیلی پاکستان آن لائن)ایران کے خاتم الانبیا مرکزی ہیڈکوارٹر نے اعلان کیا ہے کہ اسلامی جمہوریہ کی مسلح افواج ’متحرک ہیں‘ اور ’جارحیت کی صورت میں‘ جواب دیں گی۔

بی بی سی اردو کے مطابق خاتم الانبیا ہیڈ کوارٹر کے ترجمان ابراہیم ذوالفقاری نے خبردار کیا ہے کہ ’امریکی صدر اور ملک کے فوجی کمانڈروں کی بار بار دھمکیوں کے پیش نظر‘ ایرانی مسلح افواج ’متحرک‘ ہیں۔

ان کے مطابق ’ہماری قابل اور طاقتور افواج ایران کے خلاف جارحیت یا کسی بھی کارروائی کی صورت میں پہلے سے طے شدہ اہداف پر فوری اور طاقتور حملہ کرنے کے لیے طویل عرصے سے 100 فیصد تیار ہیں۔‘

واضح رہے کہ خاتم الانبیا مرکزی ہیڈکوارٹر کے اس اعلان سے چند گھنٹے قبل ہی امریکی صدر ڈونلڈ ٹرمپ نے اعلان کیا تھا کہ انھوں نے جنگ بندی میں توسیع کر دی ہے ’جب تک کہ ایران اپنی آفر پیش نہیں کرتا۔‘